Më 18-vjetorin e Pavarësisë së Kosovës, para Zyrës Ndërlidhëse të Kosovës në Beograd u mbajt një protestë nga rreth 80 persona me prirje ekstremiste serbe, të cilët kërkuan mbylljen e Zyrës. Ministria e Punëve të Jashtme dhe Diasporës (MPJD) ka dënuar përdorimin e gjuhës me tone ekstremiste dhe retorikën që nxit tensione, duke theksuar se kjo nuk kontribuon në dialogun dhe bashkëpunimin ndërmjet palëve. MPJD vlerëson të drejtën për tubim paqësor si një standard demokratik, por nënvizon se çdo formë e gjuhës së urrejtjes, nxitjes së dhunës apo kërcënimit është e papranueshme dhe bie ndesh me vlerat evropiane dhe marrëveshjet ekzistuese. Ministria riafirmon përkushtimin e Kosovës ndaj zbatimit të marrëveshjeve të dialogut dhe avancimit të marrëdhënieve fqinjësore mbi bazën e respektit, sovranitetit dhe integritetit territorial.