Ministri i Financave, Hekuran Murati, ka reaguar ashpër ndaj dekretit të presidentes Vjosa Osmani për shpërndarjen e Kuvendit, duke e cilësuar atë në shkelje të Kushtetutës. Ai ka akuzuar kabinetin e presidentes se ka përdorur jashtë kontekstit një deklaratë të tij të dhënë më 25 dhjetor të vitit të kaluar, për ta mbështetur juridikisht vendimin. Murati sqaron se deklarata e tij i referohej situatës kur pas tre raundeve të votimit për president asnjë kandidat nuk merr 61 vota, çka sipas Nenit 86 (6) të Kushtetutës çon në shpërndarjen e Kuvendit, ndërsa dekreti i fundit është nxjerrë mbi bazën e Nenit 82 (1.3), që kërkon një afat 60-ditor që duhet të respektohet para shpërndarjes. Ai thekson se dekreti është nxjerrë në ditën e dytë dhe jo pas konsumimit të afatit 60-ditor, duke e bërë atë anti-kushtetues dhe të pavlefshëm.