Kryeministri i Kosovës, Albin Kurti, ka kërkuar nga Bashkimi Evropian që Kosova të marrë statusin e vendit kandidat, një hap ky i rëndësishëm drejt integrimit evropian. Megjithatë, deputetja e PDK-së, Ariana Musliu-Shoshi, ka reaguar ashpër duke theksuar se integrimi nuk arrihet vetëm me fjalë apo kërkesa, por me punë konkrete dhe rezultate të prekshme. Ajo ka kritikuar qeverinë për mungesë të rezultateve dhe dështime në diplomaci, duke theksuar se Kosova ka mbetur në vendnumëro për më shumë se pesë vjet. Musliu-Shoshi ka kërkuar nga kryeministri që të tregojë konkretisht çfarë është bërë për të avancuar aplikimin dhe ka nënvizuar nevojën për lidership që ndërton besim dhe forcon aleancat, jo për komitete e task-forca që prodhojnë vetëm deklarata.