Ministri në detyrë i Bujqësisë, Armend Muja, ka konfirmuar se është duke u ekzekutuar një vendim i Gjykatës lidhur me pronën ku planifikohet ndërtimi i objektit të Ministrisë së Bujqësisë. Në këtë pronë aktualisht ndodhet një pompë benzine, e cila së shpejti do të rrënohet për t’i hapur rrugë ndërtimit. Muja theksoi se ndërtimi do të fillojë pavarësisht se përkon me periudhën e fushatës zgjedhore, duke theksuar se puna nuk mund të ndalet për shkak të saj. Ai gjithashtu premtoi se pronës do t’i kthehet destinimi që kishte më parë, duke respektuar vendimin e Gjykatës dhe procedurat ligjore.