Ministri në detyrë i Punëve të Jashtme dhe nënkryetari i Lëvizjes Vetëvendosje, Glauk Konjufca, ka paralajmëruar nisjen e negociatave më të thelluara me Lidhjen Demokratike të Kosovës gjatë kësaj jave. Ai theksoi se para seancës konstituive të Kuvendit, e cila do të mbahet të enjten, priten takime të nivelit politik për të zgjidhur situatën aktuale dhe për të mundësuar formimin e institucioneve të reja. LVV-ja do t’i dërgojë ftesë LDK-së për bisedime, me shpresën për arritjen e një marrëveshjeje për të gjitha pozitat e larta, përfshirë edhe atë të presidentit. Konjufca shprehu optimizëm se këto negociata do të sjellin një zgjidhje dhe do të mundësojnë formimin e institucioneve të reja në Republikën e Kosovës.