Negociatat ndërmjet Lëvizjes Vetëvendosje dhe Lidhjes Demokratike të Kosovës për zgjedhjen e presidentit të ri po përballen me shumë sfida dhe nuanca të dështimit, sipas konsulentit politik Xhevdet Pozhari. Ai thekson se mungesa e mirëbesimit mes palëve dhe taktizimet politike po e zvarrisin procesin, duke rritur rrezikun e zgjedhjeve të reja, të cilat nuk do të jenë zgjidhje e mirë për vendin. Pas një takimi të gjatë mes kryetarëve të VV-së dhe LDK-së, Albin Kurti dhe Lumir Abdixhiku, u tha se janë diskutuar emra konkretë për presidentin, por për shkak të ndjeshmërisë së bisedimeve, ata nuk i zbuluan. Një marrëveshje eventuale do të siguronte votat e nevojshme për zgjedhjen e presidentit dhe do t’i jepte fund krizës institucionale që po vazhdon prej dy vjetësh.