Instituti i Kosovës për Drejtësi (IKD) ka bërë të ditur se shumë institucione dhe agjenci të pavarura në Kosovë vazhdojnë të funksionojnë me pozita të paplotësuara dhe mandate të skaduara, për shkak të ngërçit politik dhe moskonstituimit të Kuvendit. Kjo situatë ka lënë institucione të rëndësishme si Këshillin Kombëtar të Shkencës, Gjykatën Kushtetuese dhe Avokatin e Popullit pa përbërje të plotë, duke rrezikuar funksionimin normal dhe vendimmarrjen e tyre. IKD thekson se mungesa e emërimeve të reja nuk është vetëm pasojë e krizës politike, por edhe rezultat i mosrespektimit të afateve ligjore për nisjen e procedurave të emërimeve. Instituti i bën thirrje Kuvendit dhe Qeverisë që menjëherë pas konstituimit të trajtojnë si prioritet përfundimin e këtyre procedurave në mënyrë transparente dhe mbi bazën e meritës, për të shmangur dëmtimin e funksionimit të shtetit dhe institucioneve kushtetuese.