Deputetja Albana Bytyqi nga Aleanca për Ardhmërinë e Kosovës ka theksuar se ende nuk kanë nisur diskutimet zyrtare mes partive politike për arritjen e një konsensusi lidhur me zgjedhjen e presidentit, pavarësisht deklaratave publike. Ajo ka nënvizuar se AAK-ja është e vetmja parti që ka dalë me një qëndrim të qartë dhe konkret për këtë proces, duke theksuar se nuk po bllokojnë institucionet e vendit. Sipas Bytyqit, qytetarët janë të zhgënjyer dhe kanë humbur shpresën për një zgjidhje të shpejtë të ngërçit institucional, duke menduar se vendi mund të shkojë sërish në zgjedhje. Ajo ka theksuar se zgjedhjet nuk do të mbahen për shkak të presidentit, por për shkak të qeverisë, duke kërkuar që subjektet politike të arrijnë sa më parë një konsensus për të shmangur lojërat politike dhe stabilizuar situatën.