Kanë filluar punimet për ndërtimin e rrugës Korishë–Kabash, një projekt me gjatësi 6.7 kilometra dhe vlerë mbi 4 milionë euro, i cili synon të përmirësojë lidhjen infrastrukturore në rajonin e Prizrenit. Në ceremoninë e nisjes ishin të pranishëm kryeministri Albin Kurti, ministri i Infrastrukturës Dimal Basha, deputetë lokalë dhe përfaqësues të operatorit ekonomik ERST BAU sh.p.k., që po realizon projektin. Kryeministri Kurti theksoi rëndësinë e këtij investimi për zhvillimin ekonomik dhe turistik, duke përmendur ndikimin pozitiv në zonat e Prizrenit, Shtërpcës dhe Brezovicës, si dhe për qytetarët dhe bizneset lokale. Ministri Basha garantoi përkushtim institucional për realizimin e projektit pa vonesa dhe bashkëpunim të vazhdueshëm me operatorët për tejkalimin e çdo pengese gjatë punimeve.