Të martën, më 16 qershor 2026, kanë nisur punimet për rikonstruktimin e rrugës rajonale Arllat–Malishevë, segment ky që lidh komunat e Drenasit dhe Malishevës. Projekti përfshin rehabilitimin e 11.765 kilometrave rrugë me një investim prej rreth 1.85 milionë euro dhe ka afat realizimi 150 ditë pune. Kryeministri në detyrë, Albin Kurti, dhe ministri në detyrë i Infrastrukturës, Dimal Basha, theksuan se kjo rrugë do të përmirësojë sigurinë në komunikacion, do të lehtësojë lëvizjen e qytetarëve dhe do të ndihmojë zhvillimin ekonomik të zonës. Përveç rehabilitimit të trupit të rrugës, projekti përfshin ndërtimin e trotuareve, vendndalesave për autobusë dhe vendosjen e sinjalizimit sipas standardeve evropiane, ndërsa investimet në komunën e Malishevës pritet të vazhdojnë edhe në të ardhmen.