Nisma Socialdemokrate ka propozuar kryetarin e saj, Fatmir Limajn, si kandidatin më adekuat për president të Kosovës. Vesel Krasniqi nga kjo parti e përshkroi Limajn si një figurë unifikuese dhe personalitet të njohur në jetën politike dhe historike të vendit, duke theksuar rolin e tij si komandant në Ushtrinë Çlirimtare të Kosovës gjatë luftës së viteve 1998–1999. Pas luftës, Limaj ka mbajtur poste të rëndësishme shtetërore, përfshirë deputet dhe ministër i Transportit dhe Post-Telekomunikacionit, ku realizoi projekte të mëdha infrastrukturore si autostrada Morinë–Merdarë dhe investimet në aeroportin “Adem Jashari”. Nisma Socialdemokrate fton të gjitha partitë politike, pozitën dhe opozitën, që ta zgjedhin Limajn për president, duke e konsideruar atë një njeri unifikues dhe të dëshmuar në çdo etapë të zhvillimeve politike në Kosovë.