Kryetari i Aleancës për Ardhmërinë e Kosovës, Ramush Haradinaj, së bashku me kandidatin për kryeministër Ardian Gjini, pritën në takim dy kandidatë të diasporës, Tahir Çitakun dhe Nezir Gashin. Tahir Çitaku, aktivist i njohur në Basel të Zvicrës dhe kandidati i parë shqiptar për Parlamentin e Bazelit në vitin 2008, u mirëprit në radhët e AAK-së, duke theksuar kontributin e tij politik, humanitar dhe sportiv për Kosovën. Nezir Gashi, nga Qupeva e Klinës, kandidon për herë të dytë në listën e Aleancës nga nëndega e Lörrach në Gjermani, duke forcuar lidhjet e diasporës me politikën kosovare. Haradinaj ritheksoi rëndësinë e diasporës në zhvillimin e vendit dhe e konsideroi Aleancën si një hapësirë ku zëri i bashkëkombasve jashtë Kosovës përfaqësohet me dinjitet dhe përgjegjësi.