Komisioni Qeveritar për Persona të Zhdukur ka vlerësuar mbështetjen e Komisionit Ndërkombëtar për Persona të Zhdukur (ICMP) në procesin e identifikimit të personave të zhdukur, duke theksuar rëndësinë e vazhdimit të këtij procesi deri në zbardhjen e fatit të tyre. Në takimin përmbyllës të projektit të ICMP-së, me mbështetjen e Ambasadës së Suedisë, u theksua se çdo rezultat i arritur është një hap drejt së vërtetës dhe drejtësisë për familjet e prekura. Kryesuesi Agron Limani dhe udhëheqësi Kushtrim Gara nënvizuan se ky proces është një obligim njerëzor dhe se kapacitetet vendore duhet të fuqizohen për të bartur përgjegjësinë plotësisht tek institucionet e Kosovës. Përfaqësuesit e ICMP-së dhe institucioneve të tjera theksuan rëndësinë e bashkëpunimit rajonal dhe mbështetjes së vazhdueshme për të garantuar që familjet të marrin përgjigjet që u takojnë.