Ministri në detyrë i Mbrojtjes së Kosovës, Ejup Maqedonci, ka nderuar senatoren amerikane Joni Ernst me Medaljen për Shërbim të Shquar, duke vlerësuar kontributin e saj në forcimin e marrëdhënieve ndërmjet Kosovës dhe Shteteve të Bashkuara. Ceremonia u zhvillua gjatë vizitës së senatores në Ministrinë e Mbrojtjes, ku ajo u prit edhe nga delegacioni i Gardës Kombëtare të Iowa-s, i kryesuar nga gjenerali Stephen Osborn. Në takim u diskutua për thellimin e bashkëpunimit në fushën e mbrojtjes dhe sigurisë, duke theksuar rëndësinë e partneritetit strategjik mes dy vendeve. Maqedonci theksoi se bashkëpunimi me SHBA dhe Gardën Kombëtare të Iowa-s është një nga shtyllat kryesore të zhvillimit profesional dhe forcimit të kapaciteteve mbrojtëse të Forcës së Sigurisë së Kosovës.