Ushtruesja e detyrës së presidentes së Kosovës, Albulena Haxhiu, ka pritur në takim themeluesen dhe drejtuesen e Shoqatës “JETA/VITA”, Nafije Latifi, e cila ka mposhtur tri herë kancerin e gjirit. Latifi ka shndërruar përvojën e saj personale në një angazhim të gjatë mbi dy dekada për vetëdijesimin e grave në lidhje me zbulimin e hershëm dhe mbështetjen ndaj të prekurave. Haxhiu ka vlerësuar publikisht kontributin e saj dhe të ekipit të shoqatës në edukimin dhe mbështetjen psikologjike e sociale për gratë me kancer gjiri. Ajo ka theksuar rëndësinë e mbështetjes institucionale dhe shoqërore për iniciativa të tilla që ndihmojnë në mbrojtjen e shëndetit dhe shpëtimin e jetëve.