Komisioni Qendror i Zgjedhjeve (KQZ) ka bërë të ditur se procesi i verifikimit dhe numërimit të fletëvotimeve nga votimi jashtë Kosovës, përmes postës dhe përfaqësive diplomatike, është duke vazhduar intensivisht. Nga rreth 42 mijë pako të vlerësuara deri më 11 qershor 2026, janë aprovuar 40,414 ndërsa 1,447 janë refuzuar kryesisht për shkak të mungesës së dëftesës së regjistrimit, dokument ky i domosdoshëm për konfirmimin e votuesit të regjistruar. Procesi i numërimit ka përfshirë deri tani 13 nga 47 vendvotimet në përfaqësitë diplomatike, ku nga 27,724 shtetas të regjistruar kanë votuar 22,860, duke treguar një pjesëmarrje prej 82.46%. Tërheqja e pakove me fletëvotime është përmbyllur më 8 qershor në 22 shtete dhe në Kosovë, ku janë tërhequr mbi 85,700 pako, ndërsa numri i përgjithshëm i votuesve të regjistruar për votimin me postë është 104,480.