Në sheshin “Nënë Tereza” në Prishtinë po vazhdon numërimi mbrapsht i ditëve deri në shpalljen e vendimit të Gjykatës Speciale për ish-krerët e Ushtrisë Çlirimtare të Kosovës, të cilët janë në paraburgim që nga nëntori i vitit 2020. Platforma “Liria ka Emër” ka vendosur një ekran gjigant që tregon kohën e mbetur deri më 16 shtator, datë kur pritet të merret vendimi për ish-presidentin Hashim Thaçi, kryekuvendarët Kadri Veseli e Jakup Krasniqi dhe ish-deputetin Rexhep Selimi. Në kuadër të kësaj nisme, deri në ditën e vendimit do të zhvillohen aktivitete në qytete të ndryshme të Kosovës, me fokus ruajtjen e kujtesës për luftën dhe sakrificën për liri. Kjo periudhë e pritjes ka ngjallur interes dhe vëmendje të madhe në opinionin publik kosovar.