Major Bujar Ferizi i Forcës së Sigurisë së Kosovës ka diplomuar me sukses në programin Lehrgang Generalstabs-Admiralstabs International (LGAI) në Akademinë e Lidershipit të Bundeswehr-it në Hamburg, Gjermani. Ky program prestigjioz zgjat 17 muaj dhe përfshin 5 muaj trajnim intensiv të gjuhës gjermane, si dhe 12 muaj studime të thelluara në planifikimin strategjik, lidershipin ushtarak, bashkëpunimin shumëkombësh dhe sigurinë ndërkombëtare. Në këtë gjeneratë morën pjesë 74 oficerë nga 36 vende të ndryshme, duke krijuar një platformë për shkëmbimin e përvojave profesionale dhe forcimin e bashkëpunimit ndërkombëtar. Përfaqësimi i Kosovës në këtë nivel tregon avancimin dhe angazhimin e FSK-së në arenën globale të sigurisë.