Aktiviteti “Ora e Pritjes” ka nisur edhe në Malishevë, duke iu bashkuar qyteteve të tjera të Kosovës në numërimin mbrapsht drejt 16 shtatorit, datës së pritshme të aktgjykimit ndaj ish-krerëve të Ushtrisë Çlirimtare të Kosovës në Hagë. Në këtë ngjarje morën pjesë përfaqësues të platformës qytetare “Liria Ka Emër”, së bashku me qytetarë dhe përfaqësues lokalë, të cilët përcollën mesazhin se kjo orë simbolizon pritjen, besimin dhe mbështetjen për çlirimtarët. Organizatorët theksuan se përfshirja e qyteteve të ndryshme tregon solidaritet të gjerë dhe përkushtim për ruajtjen e kujtesës dhe vlerave të luftës çlirimtare. Në prag të Marshit për Liri më 12 shtator në Prishtinë, kjo nismë vazhdon të bashkojë qytetarët me mesazhin e përbashkët: Kosova po pret, ora e pritjes është ora e lirisë.