Në kuadër të shënimit të 28-vjetorit të Epopesë së Ushtrisë Çlirimtare të Kosovës (UÇK), Forca e Sigurisë së Kosovës (FSK) u rreshtua në kazermën “Adem Jashari” në Prishtinë, ku u zhvilluan homazhe dhe ceremoni solemne. Presidentja Vjosa Osmani dhe kryeministri Albin Kurti theksuan se FSK-ja është trashëgimtare e denjë e UÇK-së, duke bartur në zemër idealin e lirisë dhe përgjegjësinë për sigurinë e vendit. Osmani vuri në pah se Epopeja e marsit 1998 dëshmon se liria fitohet me sakrificë, unitet dhe besim në të drejtën për të jetuar të lirë në trojet shekullore. Kurti shtoi se FSK-ja është kthyer në një ushtri moderne që bashkëpunon me forcat e NATO-s në misione paqeruajtëse ndërkombëtare, duke u rreshtuar me ushtritë më të avancuara, ashtu si mund ta ketë ëndërruar legjendari Adem Jashari. Në këtë përvjetor, Qeveria dhe Kuvendi mbajtën mbledhje solemne për të nderuar rezistencën dhe sakrificën e UÇK-së dhe familjes Jashari.