Presidentja e Kosovës, Vjosa Osmani, priti në takim drejtorin në largim të Ekipit Këshillues dhe Ndërlidhës të NATO-s (NALT), gjeneral brigade Sven Lange, dhe përfaqësuesen e NATO-s, Blanca Hereza Atienza. Gjatë takimit u diskutua për bashkëpunimin ndërmjet Kosovës dhe NATO-s, si dhe rolin e aleancës në ruajtjen e sigurisë dhe stabilitetit në vend. Osmani shprehu mirënjohje për angazhimin e vazhdueshëm të NATO-s dhe vlerësoi kontributin e NALT-it në zhvillimin dhe profesionalizimin e Forcës së Sigurisë së Kosovës, duke forcuar kapacitetet profesionale dhe institucionale. Ajo falënderoi veçanërisht gjeneral brigade Sven Lange për punën dhe përkushtimin gjatë mandatit të tij njëvjeçar, duke ritheksuar përkushtimin e Kosovës për paqe, stabilitet dhe integrim në strukturat euroatlantike, përfshirë NATO-n.