Presidentja e Kosovës, Vjosa Osmani, ka kujtuar masakrat e 31 marsit 1999 në Pastaselë të Rahovecit dhe në Burim të Malishevës, ku regjimi serb vrau në mënyrë mizore 106 civilë në Pastaselë dhe 42 në Burim. Ajo i ka cilësuar këto ngjarje si krime të rënda kundër civilëve të pafajshëm, duke theksuar se ato ishin sulme të qëllimshme ndaj jetës, dinjitetit dhe ekzistencës së popullit shqiptar. Nga masakra në Pastaselë kanë mbijetuar 13 persona, të cilët ruajnë kujtesën dhe të vërtetën për këto ngjarje tragjike. Presidentja Osmani ka theksuar se pa drejtësi nuk mund të ketë paqe të qëndrueshme dhe ka bërë thirrje që kujtimi për viktimat të jetë i përhershëm.