Organizata e Veteranëve të Luftës së Ushtrisë Çlirimtare të Kosovës ka reaguar lidhur me procesin e krijimit dhe funksionimit të Dhomave të Specializuara të Kosovës, duke vënë në dyshim legjitimitetin dhe perceptimin publik të kësaj gjykate. Sipas OVL-së, themelimi i Gjykatës Speciale nuk erdhi nga reforma e brendshme, por si pasojë e raportit të senatorit zviceran Dick Marty në vitin 2011, i cili akuzonte pjesëtarët e UÇK-së për krime të rënda, duke përfshirë trafikimin e organeve. Ky raport krijoi presion ndërkombëtar dhe solli një realitet të ri politik, ku Gjykata u fokusua vetëm në krimet e supozuara të shqiptarëve, duke krijuar perceptimin e një drejtësie të fragmentuar dhe një mekanizmi të njëanshëm.