Organizata e Veteranëve të Luftës së UÇK-së (OVL UÇK) ka reaguar ashpër ndaj deklaratave të ambasadorit gjerman Rainer Rudolph, duke ngritur dyshime për ndikime të jashtme në procesin gjyqësor në Hagë. Kryetari i OVL UÇK-së, Hysni Gucati, ka theksuar se diskutimet për “dënime apo lirime” nga ambasadorë ndërkombëtarë në prag të vendimit të Gjykatës Speciale janë një përpjekje për të parapërgatitur opinionin publik për një vendim që, sipas tij, “duket se tashmë është i shkruar diku tjetër”. Ai ka akuzuar se këto deklarata përbëjnë paragjykim të hapur të procesit dhe ndikim të jashtëm, duke kërkuar që drejtësia të mbetet e pavarur dhe e pandikuar nga faktorë të jashtëm. Në përfundim, Gucati ka bërë të qartë se OVL UÇK nuk do të pranojë asnjë vendim që cenon luftën e UÇK-së dhe sakrificën e luftëtarëve të saj.