Organizata e Veteranëve të Luftës së UÇK-së ka reaguar pas njoftimit se Ligji për Vlerat e Luftës Çlirimtare të Kosovës do të procedohet në Qeveri dhe më pas në Kuvend, duke e konsideruar këtë si rezultat të angazhimit të tyre të vazhdueshëm. Ata theksojnë se prej muajsh kanë kërkuar trajtimin e ligjit përmes shkresave zyrtare, deklaratave publike dhe prani në media, duke kundërshtuar vonesat dhe neglizhencën institucionale. OVL-UÇK kërkon që ligji të mos mbetet vetëm simbolik, por të pasqyrojë plotësisht kërkesat e tyre dhe të garantojë njohje dinjitoze për të gjitha kategoritë e pjesëmarrësve në luftë. Ata paralajmërojnë vigjilencë të plotë gjatë procesit ligjor dhe refuzojnë çdo përpjekje për të zbehur vlerat e UÇK-së, duke theksuar se këto janë një borxh i përhershëm ndaj sakrificës së luftëtarëve të Kosovës.