Organizata e Veteranëve të Luftës së Ushtrisë Çlirimtare të Kosovës (OVL-UÇK) ka reaguar ashpër ndaj kryeministrit Albin Kurti për vendimin e Qeverisë së tij që lejon zbatimin e Ligjit për të huajt dhe për automjetet me lehtësira për serbët që punojnë në institucionet paralele apo studiojnë në universitetin në veri. OVL-UÇK e ka cilësuar këtë si një skandal politik dhe moral, duke akuzuar Kurtin për hipokrizi dhe për negociata në prapaskenë që hapin hapësira të reja për strukturat ilegale të Serbisë brenda Kosovës. Veteranët theksojnë se kjo politikë është mashtrim ndaj qytetarëve dhe cenim i sakrificës së luftës çlirimtare, duke paralajmëruar reagim të fuqishëm ndaj çdo përpjekjeje për të relativizuar këtë sakrificë dhe për të lejuar ndikimin serb në institucionet e Kosovës. Vendimi i Qeverisë, i kërkuar nga Bashkimi Evropian dhe i mbështetur nga disa ambasadorë, ka nxitur reagime të forta nga opozita dhe nga OVL-UÇK, e cila e sheh si një kompromis të papranueshëm që bie ndesh me retorikën patriotike të Kurtit.