Organizata e Veteranëve të Luftës së UÇK-së (OVL-UÇK) ka reaguar ndaj vendimit të fundit të Gjykatës Speciale, duke e cilësuar atë si një goditje ndaj parimit të një procesi të drejtë. Sipas OVL-UÇK-së, leja për Prokurorinë që të dorëzojë materiale të reja pas mbylljes së rastit, të cilat janë quajtur “njoftime” dhe jo prova, përbën një manovër të rrezikshme procedurale. Kjo situatë cenon barazinë mes palëve në proces dhe kufizon mundësinë e mbrojtjes për një përballje të barabartë. Organizata thekson se drejtësia nuk mund të ndërtohet mbi standarde të dyfishta dhe e konsideron këtë vendim si një proces të njëanshëm.