Organizata e Veteranëve të Luftës së UÇK-së (OVL UÇK) ka reaguar me shqetësim të thellë ndaj vendimit për dyfishimin e kostove të komunikimit telefonik për ish-bashkëluftëtarët që ndodhen në Hagë. Sipas organizatës, telefonatat për këta persona nuk janë luks, por një nevojë thelbësore shpirtërore dhe emocionale, pasi ato përbëjnë lidhjen e vetme me familjet e tyre, të cilat po përballen me barrën e ndarjes. OVL UÇK e konsideron këtë masë jo vetëm një barrë financiare, por edhe një goditje morale dhe çnjerëzore që rëndon lidhjet njerëzore dhe familjare në një kohë kur mbështetja është më e nevojshme se kurrë.