Ministrja e Mjedisit dhe Planifikimit Hapësinor, Fitore Pacolli, ka liruar nga detyra ushtruesin e detyrës së Drejtorit Ekzekutiv të Agjencisë Kadastrale të Kosovës, Avni Ahmetin, dhe ka emëruar në vend të tij Faik Kelmendin. Ky ndryshim bëhet si pjesë e procesit të reformave dhe forcimit të kapaciteteve institucionale me qëllim rritjen e efikasitetit dhe llogaridhënies në fushën e kadastrës dhe pronës. Pacolli ka theksuar se këto masa synojnë avancimin e prioritetve në shërbim të qytetarëve dhe shtetit. Gjithashtu, ajo ka emëruar Bajram Kafexhollin si ushtrues detyre të Sekretarit të përgjithshëm të Ministrisë, duke vijuar me ndryshime për forcimin e kapaciteteve dhe përkushtimin ndaj reformave të vazhdueshme në ligjshmëri dhe mbrojtjen e mjedisit.