Ministrja e Mjedisit dhe Planifikimit Hapësinor, Fitore Pacolli, zhvilloi një takim në Londër me të Dërguarën Speciale të Mbretërisë së Bashkuar për Ballkanin Perëndimor, Dame Karen Pierce. Gjatë takimit, i cili u zhvillua në prani të Ambasadorit të Kosovës në Londër, Ilir Kapiti, u diskutua për forcimin e marrëdhënieve bilaterale dhe bashkëpunimin e ngushtë mes dy vendeve. Ministrja Pacolli prezantoi prioritetet e ministrisë së saj, duke vlerësuar ndihmën dhe ekspertizën britanike në mbështetjen e reformave për zhvillimin e Kosovës, me theks të veçantë në rëndësinë e planifikimit hapësinor për barazi dhe gjithëpërfshirje. Ajo gjithashtu shprehu mirënjohje për pritjen e ngrohtë dhe gatishmërinë e vazhdueshme të Dame Karen Pierce për të mbështetur Kosovën në sfidat e përbashkëta.