Misioni ushtarak i NATO-s në Kosovë, KFOR-i, ka bërë të ditur se është në gatishmëri dhe vazhdon të përshtasë qëndrimin e tij në përputhje me situatën e sigurisë për shkak të protestave të mundshme më 16 shtator, ditën kur pritet aktgjykimi ndaj katërshes së UÇK-së. KFOR-i thekson se ruan kapacitetet dhe fleksibilitetin për të zbatuar mandatin e Kombeve të Bashkuara dhe bashkëpunon ngushtë me Policinë e Kosovës dhe EULEX-in për të garantuar sigurinë dhe lirinë e lëvizjes. Ndërkohë, Ambasada Amerikane në Kosovë ka paralajmëruar qytetarët të shmangin zonat ku do të zhvillohen protestat dhe të jenë të kujdesshëm pranë grumbullimeve të mëdha, duke paralajmëruar për mundësinë e mbylljes së rrugëve dhe pengesave në trafik. Këto masa dhe paralajmërime vijnë në prag të një dite që pritet të sjellë tensione dhe reagime të forta në vend.