Ambasada e Republikës së Kosovës në Emiratet e Bashkuara Arabe ka paralajmëruar qytetarët kosovarë që ndodhen në Abu Dhabi për ndalimin e fotografimit, incizimit dhe shpërndarjes së pamjeve nga incidentet me raketa apo dronë. Sipas njoftimit zyrtar, kjo praktikë është e ndaluar në përputhje me legjislacionin dhe rregullat e brendshme të Emirateve të Bashkuara Arabe. Autoritetet lokale zbatojnë masa të rrepta ligjore për shkelësit, duke përfshirë gjoba të larta financiare, dënime me burg, konfiskim të pajisjeve elektronike dhe deportim me ndalim rikthimi në vend. Ambasada ka bërë thirrje për respektimin e ligjeve dhe rregullave në fuqi, duke theksuar rëndësinë e ruajtjes së sigurisë dhe rendit publik në vendin pritës.