Të mërkurën në Komisionin për Politikë të Jashtme të Parlamentit Evropian do të votohet raporti për Kosovën, i cili shpreh keqardhje për ngërçin politik dhe situatën e vështirë institucionale në vend. Raporti paralajmëron se për shkak të procesit zgjedhor dhe mungesës së kompromisit për zgjedhjen e presidentit, Kosova mund të humbasë mbështetje financiare të rëndësishme nga Plani i Rritjes dhe të mos përmbushë reformat brenda afateve. Në të njëjtën kohë, dokumenti mbështet fuqishëm aspiratat e Kosovës për integrim në Bashkimin Evropian, duke kërkuar nga shtetet anëtare njohjen e pavarësisë së saj dhe dhënien e statusit të kandidatit pa vonesa. Raporti gjithashtu thekson nevojën për bashkëpunim mes Kosovës dhe Serbisë për ndjekjen penale të autorëve të sulmit terrorist në Banjskë dhe kritikon masat e mëparshme që kanë pasur ndikim negativ në shoqërinë kosovare.