Ministri i Drejtësisë së Maqedonisë së Veriut, Jeton Shasivari, zhvilloi një takim me Nicole Varns, ushtruese e detyrës së shefes së Misionit në Ambasadën e SHBA-së, ku u konfirmua bashkëpunimi i ngushtë dhe i vazhdueshëm mes dy palëve për reformën në sistemin e drejtësisë. Diskutimet u fokusuan në prioritetet kryesore si sundimi i ligjit, lufta kundër korrupsionit, digjitalizimi i sistemit gjyqësor dhe agjenda legjislative, me theks të veçantë te reforma e legjislacionit penal. Ministri Shasivari kërkoi shkëmbim përvojash dhe ndihmë ekspertësh nga SHBA-ja për të avancuar proceset reformuese dhe për të forcuar kapacitetet institucionale në luftën kundër krimit të organizuar ndërkombëtar. Gjithashtu, u theksua fillimi i zbatimit të projektit për mbështetjen e Strategjisë Kombëtare për Drogat, i financuar nga Byroja për Çështje Ndërkombëtare të Narkotikëve dhe Zbatimit të Ligjit pranë Departamentit Amerikan të Shtetit.