Partia Demokratike e Kosovës (PDK) ka shprehur keqardhje për situatën e krijuar në procesin e zgjedhjes së Presidentit të ri të Kosovës, duke akuzuar shumicën parlamentare dhe kryeministrin Albin Kurti për papërgjegjshmëri dhe mosgatishmëri për të arritur një marrëveshje gjithëpërfshirëse. PDK thekson se vendi po përballet me rrezikun e një krize të panevojshme institucionale, pasi shumica parlamentare ka vendosur të kandidojë një kandidat tërësisht partiak, pa koordinim me subjektet e tjera dhe pa mundësinë e arritjes së konsensusit. PDK ka bërë të ditur se ka marrë pjesë në konsultime, ka hequr vijat e kuqe për të krijuar hapësirë për një zgjidhje dhe ka qenë e gatshme të mbështesë një kandidat konsensual që garanton unitet dhe stabilitet institucional, por të gjitha këto mundësi janë refuzuar nga shumica. Si një mekanizëm balancues për të shmangur përqendrimin e pushtetit, PDK ka kërkuar që të zgjidhet një President i propozuar nga vetë ajo, por kjo kërkesë gjithashtu është refuzuar, duke lënë përgjegjësinë për krizën tek shumica parlamentare dhe ata që e qeverisin vendin.