Grupi Parlamentar i Partisë Demokratike të Kosovës (PDK) organizoi homazhe te Memoriali kushtuar personave të zhdukur me dhunë gjatë luftës së fundit në Kosovë, duke nderuar kujtimin e tyre dhe shprehur solidaritet me familjet që prej më shumë se dy dekadash presin përgjigje. PDK thekson se zbardhja e fatit të secilit person të zhdukur mbetet një nga obligimet më të rëndësishme të institucioneve të Republikës së Kosovës dhe se kërkimi për të vërtetën nuk do të ndalet. Në mesazhin e saj, partia nënvizon se e vërteta, drejtësia dhe kujtesa janë detyrime të përhershme për shoqërinë dhe institucionet. PDK do të vazhdojë të qëndrojë pranë familjeve dhe të kërkojë angazhim institucional të vazhdueshëm deri në zbardhjen e fatit të të gjithë personave të zhdukur.