Kryetari i PDK-së, Bedri Hamza, ka bërë me dije se kryeministri në detyrë, Albin Kurti, nuk i ka ofruar asnjë ofertë konkrete partisë së tij gjatë takimit për krijimin e institucioneve të reja të Kosovës. Hamza theksoi se PDK nuk kërkon pozita të veçanta, por një marrëveshje gjithëpërfshirëse politike që përfshin konstituimin e Kuvendit, formimin e Qeverisë dhe zgjedhjen e presidentit të ri. Ai shtoi se pa një garanci për pjesëmarrje në vendimmarrje, PDK nuk do të jetë pjesë e proceseve që i krahasoi me “seriale latino-amerikane” me shumë epizoda. Në mungesë të ofertës serioze, PDK paralajmëron se do të jetë në opozitë, duke lënë të hapur mundësinë e bashkëpunimit në të ardhmen.