Instituti i Kosovës për Drejtësi (IKD) po vazhdon mbledhjen e nënshkrimeve në Pejë për nismën legjislative qytetare që synon ndryshimin dhe plotësimin e Kodit Penal të Kosovës. Nisma përfshin dy propozime kryesore: dënimin e moszbatimit të vendimeve të Gjykatës Kushtetuese dhe sanksionimin penal të përdorimit të parasë publike për përfitim elektoral gjatë periudhave zgjedhore. Aktiviteti po zhvillohet në Sheshin “Skënderbeu” dhe është mbështetur fuqishëm nga kryetari i komunës së Pejës, Gazmend Muhaxhiri, si dhe nga përfaqësues të shoqërisë civile dhe qytetarë të shumtë. IKD ka paralajmëruar se mbledhja e nënshkrimeve do të vazhdojë edhe në komunat e tjera të Kosovës, duke synuar të paktën 10 mijë nënshkrime për procedimin e nismës në Kuvend.