Ministri në detyrë i Infrastrukturës dhe Transportit, Dimal Basha, ka njoftuar se ndaj operatorëve që po punojnë në rrugën Prishtinë–Podujevë po aplikohen penalitete për mosrespektim të afateve të punimeve. Pas një inspektimi të projektit, është vendosur që afatet të shtyhen, por me obligime të qarta për përfundimin e punimeve në kohë. Për muajin korrik, një operator në segmentin e Vranidollit është gjobitur me 24 mijë euro për vonesa. Ministri Basha paralajmëroi se penalitetet do të vazhdojnë në të gjitha segmentet ku nuk respektohen planet dinamike dhe afatet kontraktuale, duke theksuar se nuk do të ketë tolerim për neglizhencën në punë.