Sindikata e Policisë së Kosovës ka paraqitur kërkesën për miratimin e një ligji që lejon pensionimin e parakohshëm të zyrtarëve policorë nga mosha 55-vjeçare. Sipas propozimit, pensioni do të fillojë me 60% të pagës bruto dhe do të rritet me 2% për çdo vit përvojë pune, por nuk do të kalojë 80% të pagës bruto. Gjithashtu, gjatë përllogaritjes së pensionit do të merret parasysh paga më e lartë e zyrtarit gjatë karrierës së tij, ndërsa një vit para pensionimit, policëve do t’u ngrihen dy grada si njohje për kontributin e tyre. Sindikata ka paralajmëruar se nuk do të pranojë një projektligj që nuk i përmbush interesat e zyrtarëve policorë dhe thekson se pensioni duhet të mbetet i pandryshueshëm edhe pas moshës 65-vjeçare.