Komisioni Qendror i Zgjedhjeve (KQZ) po vijon me përgatitjet për zgjedhjet e 7 qershorit 2026, duke nisur trajnimin e rreth 14 mijë anëtarëve të Këshillave të Vendvotimit nga të gjitha komunat e Kosovës. Këta anëtarë do të jenë përgjegjës për mbarëvajtjen e procesit të votimit në 2,498 vendvotime, ku përfshihen 911 qendra votimi për votimin e rregullt dhe 52 vendvotime për votimin me kusht. Trajnimet po zhvillohen aktualisht dhe do të vazhdojnë gjatë javës së ardhshme, me qëllim përgatitjen sa më të mirë të stafit zgjedhor. Në mbledhjen e ardhshme pritet emërimi i rreth 700 anëtarëve të tjerë për të garantuar administrimin korrekt të procesit zgjedhor në të gjitha komunat.