Sot shënohen 28 vjet nga Beteja e Kaçandollit, një nga betejat më të lavdishme të Ushtrisë Çlirimtare të Kosovës në Llap dhe në tërë Kosovën. Kjo betejë frontale treditore ishte përballja e parë e UÇK-së kundër forcave serbe në këtë rajon, ku ranë shtatë dëshmorë të shquar të luftës. Komuna e Podujevës, në bashkëpunim me organizatat e dala nga lufta, ka organizuar homazhe dhe aktivitete përkujtimore për nder të dëshmorëve dhe luftëtarëve të UÇK-së. Ceremonitë përfshijnë homazhe në “Kompleksin e Dëshmorëve” në Penuhë dhe manifestime në Kaçandoll, duke filluar nga ora 11:30 e më pas në orën 13:00.