Sot shënohet dita e dytë e Epopesë së Ushtrisë Çlirimtare të Kosovës, e njohur si Dita e Dëshmorëve, me homazhe dhe aktivitete përkujtimore në nderim të të rënëve për liri. Ceremonitë fillojnë që në orët e para të mëngjesit në Kompleksin Memorial Adem Jashari në Prekaz, ku marrin pjesë krerët e shtetit, përfaqësues institucionalë, organizata të ish-luftëtarëve dhe qytetarë të shumtë. Në kuadër të kësaj dite hapet edhe ekspozita “Tri ditë që ndryshuan historinë”, ndërsa në orën 19:00 mbahet një akademi përkujtimore me pjesëmarrje artistike nga Opera dhe Filarmonia e Kosovës. Aktivitetet përmbyllen nesër me manifestimin tradicional “Nata e Zjarreve” në Prekaz, ndërsa homazhe kryhen edhe në komplekset memoriale të dëshmorëve në të gjitha komunat e Kosovës.