Në 27-vjetorin e rënies së dëshmorëve dhe martirëve në fshatin Doganaj, është mbajtur një akademi përkujtimore ku u nderuan ata që dhanë jetën për liri. Kryesuesi i Kuvendit Komunal, Selajdin Troni, theksoi se sakrifica e tyre dhe dhimbja e fëmijëve të pafajshëm që u vranë atë ditë nuk do të harrohen kurrë, duke e cilësuar 13 prillin si një nga ditët më të rënda për Doganajn dhe Sllatinë e Kaçanikut. Në emër të Organizatës së Veteranëve të Luftës së Ushtrisë Çlirimtare të Kosovës, Fahri Demnika kujtoi dhunën e pamëshirshme që forcat serbo-malazeze ushtruan ndaj popullit të pafajshëm dhe theksoi se e vërteta për krimet nuk duhet harruar apo shtrembëruar. Në këtë përvjetor, emocione të veçanta shprehën edhe familjarë të dëshmorëve, përfshirë djalin e martirit Vesel Elezi, i cili falënderoi të pranishmit dhe nderoi kujtimin e babait të tij dhe të gjithë atyre që dhanë jetën për lirinë e vendit.