Në kuadër të 28-vjetorit të Epopesë së Ushtrisë Çlirimtare të Kosovës, kryetari i Komunës së Prishtinës, Përparim Rama, së bashku me përfaqësues të organizatave të dala nga lufta e UÇK-së, mbajtën ligjërata para nxënësve të shkollës së mesme “Xhevdet Doda”. Gjatë ligjëratave u theksuan vlerat e luftës dhe sakrifica e atyre që luftuan për lirinë e Kosovës. Rama theksoi rëndësinë e ruajtjes dhe përcjelljes së kësaj historie tek brezat e rinj, duke nënvizuar përgjegjësinë e shoqërisë për të mos harruar rrugën e vështirë drejt lirisë. Në aktivitet morën pjesë edhe udhëheqësi i Sektorit për Çështje të Kategorive të Dala nga Lufta e UÇK-së, Sylë Vitia, dhe drejtori për Arsim në Prishtinë, Samir Shahini, të cilët ndanë reflektime me nxënësit për guximin dhe idealet e luftës çlirimtare.