Ministrja në detyrë e Drejtësisë, Donika Gërvalla, vizitoi shoqatën “Handikos” në Ferizaj, ku theksoi rëndësinë e mbështetjes institucionale për personat me aftësi të kufizuara. Ajo nënvizoi se kjo mbështetje nuk duhet të shihet si një gjest simbolik apo privilegj, por si një detyrë thelbësore shtetërore dhe njerëzore që garanton dinjitetin dhe barazinë e këtyre qytetarëve. Gjatë vizitës u diskutua edhe për objektin e ri të “Handikos”-it dhe nevojën për qasje më të mirë në shërbime rehabilituese, sociale dhe mbështetëse. Gërvalla vlerësoi gjithashtu bashkëpunimin me Shërbimin Sprovues Rajonal, duke theksuar kontributin e rëndësishëm të “Handikos”-it në riintegrimin social dhe forcimin e qasjes rehabilituese në shoqëri.