Kryetari i Prishtinës, Përparim Rama, ka bërë të ditur se ka ftuar të gjitha partitë politike për të formuar një koalicion në kryeqytet, ndërsa kabineti i ri pritet të prezantohet brenda ditëve në vijim. Ai theksoi se qeverisja aktuale është në vazhdimësi të mandatit të kaluar, me disa ndryshime të publikuara tashmë, dhe se drejtoritë janë funksionale dhe po vazhdojnë punën normalisht. Rama sqaroi se disa parti janë në pritje për shkak të zhvillimeve në nivel qendror, përfshirë proceset zgjedhore dhe zgjedhjen e presidentit, duke kërkuar durim për finalizimin e marrëveshjeve. Ai gjithashtu nënvizoi nevojën për një koalicion të gjerë për të përballuar projektet madhore që presin kryeqytetin, si përgatitjet për Lojërat Mesdhetare 2030, investimet në arsim, sport dhe transport urban.