Kreu i LDK-së, Lumir Abdixhiku, ka thirrur një mbledhje të re të Grupit Parlamentar, e para pas përçarjes së thellë që u shfaq për shkak të ujdisë me VV-në dhe kandidatin për president, Bekim Sejdiun. Në mbledhjen e mëparshme, gjashtë deputetë të LDK-së shprehën kundërshtimin e tyre ndaj procesit të votimit për Sejdiun, duke krijuar tensione të forta brenda grupit. Pas kësaj, kanë pasur reagime të shumta, përfshirë akuza publike nga Abdixhiku, i cili i konsideroi veprimet e disa deputetëve si dëm të pariparueshëm për partinë. Mbledhja e sotme synon të vazhdojë diskutimet dhe të gjejë një rrugëdalje nga kjo krizë e brendshme.