Më pak se dy javë para nisjes së fushatës zyrtare për zgjedhjet e parakohshme parlamentare në Kosovë, skena politike është përfshirë nga akuza të ndërsjella për shantazh, presione dhe keqpërdorim të burimeve shtetërore. Në terren është regjistruar edhe një përplasje fizike mes kundërshtarëve politikë, ku Lëvizja Vetëvendosje akuzon kryetarin e Skenderajt, Sami Lushtaku, për sulm ndaj kandidatit të saj, ndërsa Lushtaku pretendon sulme nga mekanizmat e Kurtit. Përfaqësues të shoqërisë civile kanë dënuar dhunën si mjet të papranueshëm në politikë dhe kanë kërkuar trajtim të paanshëm nga organet e drejtësisë.