Propozimi për ndarjen e mbi 250 milionë eurove për organizimin e Lojërave Mesdhetare “Prishtina 2030” ka shkaktuar debate të forta në Komisionin për Kulturë, Turizëm dhe Sport. Deputetja e LDK-së, Adelina Thaçi-Meta, kërkoi që të paktën 60% e buxhetit të shkojë drejtpërdrejt në Komunën e Prishtinës për zhvillimin e infrastrukturës sportive dhe transportit, duke argumentuar se shumica e ngjarjeve do të organizohen aty. Ky amendament u kundërshtua nga Ministri i Rinisë dhe Sportit, Blerim Gashani, dhe deputetët e Vetëvendosjes, të cilët argumentuan se ndarja territoriale e fondeve bie ndesh me ligjet dhe kontratën e qytetit nikoqir, duke theksuar se përgjegjësitë financiare janë të ndërlidhura dhe nuk duhet të përcaktohen me përqindje fikse. Një propozim tjetër për transparencë në lidhjen e kontratave, i paraqitur nga deputetja e PDK-së, Arbnora Salihu, gjithashtu nuk u miratua. Në përfundim, projekti ligj u dërgua për vlerësim të mëtejshëm në Komisionin e Përhershëm dhe më pas në Kuvend për votim final.